ປະຫວັດຄວາມເປັນມາ

ສູນພັດທະນາຊົນນະບົດ ແມ່ນຫ້ອງການເອກະຊົນ ເຊິ່ງແມ່ນຄົນລາວເປັນຜູ້ດຳເນີນທຸລະກິດບົນພື້ນຖານຫລັກການບໍ່ຫວັງຜົນກໍາໄລ, ຫ້ອງການສູນພັດທະນາຊົນນະບົດ ແມ່ນເຮັດວຽກຮ່ວມກັບຊຸມຊົນ, ໄວໜຸ່ມ, ອຳນາດການປົກຄອງທ້ອງຖິ່ນ ແລະ ຫົວຫນ້າຊຸມຊົນ ບົນພື້ນຖານການສົ່ງເສີມຄວາມຍືນຍົງ ແລະ ການພັດທະນາຊົນນະບົດໃນ ສປປ ລາວ. ສູນພັດທະນາຊົນນະບົດ ເຊື່ອວ່າ ທຸກຄົນມີພາວະຜູ້ນໍາໃນຕົນເອງທີ່ສາມາດສ້າງການປ່ຽນແປງໄດ້ຕະຫຼອດເວລາ ຖ້າຫາກວ່າພວກເຂົາໄດ້ແລກປ່ຽນສົນທະນາໃນບັນຍາກາດຂອງການຮຽນຮູ້ທີ່ແທ້ຈິງ ເຊິ່ງຈະພາໃຫ້ເກີດຄວາມກ້າໃນການຕັດສີນໃຈລົງມືເຮັດ ແລະ ແລກປ່ຽນກັບຄົນອື່ນຕໍ່ໆໄປ. ພວກເຮົາໃຫ້ຄຸນຄ່າກັບການພັດທະນາຕົນເອງດ້ວຍການສ້າງແຮງຈູງໃຈໂດຍເຫັນເຖິງທ່າແຮງ ແລະ ເຂົ້າໃຈບັນຫາທີ່ແທ້ຈິງຈາກການສະໜັບສະໜູນຂອງຄົນອ້ອມຂ້າງ ແລະ ບັນດາກັນລະຍານະມິດ ເພື່ອກ້າວໄປເຖິງການກຸ້ມຕົນເອງ, ຊຸມຊົນ ແລະ ສັງຄົມ. ຄວາມຮັບຜິດຊອບຂອງທີມງານຕໍ່ພາລະກິດຄື ອຳນວຍຄວາມສະດວກໃນການເສີມສ້າງຄວາມສາມາດແບບບູລະນາການ ແລະ ຮັບປະກັນຄຸນນະພາບດ້ານສິ່ງແວດລ້ອມ, ໂພຊະນາການ, ພັດທະນາໄວໜຸ່ມ ແລະ ການຮຽນຮູ້ຊຸມຊົນເພື່ອຄວາມຢູ່ດີມີສຸກຂອງຄົນລາວ ແລະ ວິໄສທັດຄື ເປັນຕົ້ນແບບທີ່ສ້າງແຮງຈູງໃຈ ແລະ ເສີມສ້າງຄວາມອາດສາມາດດ້ານການພັດທະນາຕົນເອງ ແລະ ຊຸມຊົນແບບຮອບດ້ານ. ເປົ້າໝາຍໝາຍໃນໄລຍະ 3ປີຂອງສູນພັດທະນາຊົນນະບົດຄື ເປັນມືອາຊີບ ແລະ ມີຄັງຄວາມຮູ້ດ້ານການສຶກສາສິ່ງແວດລ້ອມ, ຄວາມໝັ້ນຄົງດ້ານສະບຽງອາຫານ ແລະ ເຄື່ອງມືການຮຽນຮູ້ຊຸມຊົນ ຜ່ານການເສີມສ້າງຄວາມສາມາດຂອງໄວໜຸ່ມ ແລະ ແມ່ຍິງໃຫ້ໄດ້ 20 ຊຸມຊົນພາຍໃນໄລຍະ 3 ປີ.